بحظرة جمالك

انا بحظرة جمالك أزهد العشاگ
متطرف بحبك قافل البيبان
من تگبل علي سجادة أسوي الروح
واتوضة بعطر لو شفت وكتك حان
اتعثر اگبالك بالچذب تمثيل
خاطر بالوجهه تاخذني بالأحظان
وما چني حظنتك چني ذاك اليوم
حاظن جنس حوا من الخلق للأن
تعلى انفاسنة وتعرفهة ما هي انفاس
حمم خلص صبرهة وتنذر ابركان
ويهب عالي الهوى وشعرك علي يثور
شن ضدي حرب ما خلى حسنك بان
يصعد علوجة ويبوش الوجنات
انزلة على الزنود يفصللهة اردان
رح اغرك بشعرك لو ردت ماموت
دنيلي الشفايف وانقذ الغرگان
طولك مستقيم الدنيا تحلف بيه
بس خصرك فضحني بكل وكت سكران
معذور يتمايل شرب كوم عيون
هوة احنة النباوع صار عدنة ادمان
لا توصل الحينة الناس ضجت بيك
شارعنة اشتكالي وزعلو الجيران
انته شونك سلمت وتعديت
ما تدري وراك تطلگن نسوان
شباب البطرف شيبو من شافوك
والشياب لبسو مودة الشبان
تعال أگرب حبيبي ذنوب عندي هواي
اريدك ذنب اكبر تكلب الميزان
اسولفلك سوالف ما لمسهن بال
وأذبحلك غزل ميذبحة ياهو الچان
آنا صاحب قصيدة تشبع الأحساس
مو صاحب قصيدة تشبع الديوان

رووووووعه
يسلموووووووو

حلوووة قلب

شكرااااااااااااااا