رئيس البرلمان اسامه النجيفي يقول مضيعين اربعين مليار دولار!!. اي والله
اربعين مليار. يمعوّد مو انته مصلاوي والمصلاوي اذا ضاع منه دينار يعلن
الحداد شهرين
يمكن الحكومه كانت صاعده باص وانضربت جيب ؟. فاذا اكو واحد شاف نشال شايل
اربعين مليار يبلّغ اقرب حسينيه, حتى نطلع كلنه نلطم ونضرب زنجيل وقامه
على هل المصيبه السوده
لو يمكن استثمرت الحكومه الاموال في البورصه بشرائها صفقة بيتنجان, ثم
هبط سعره بعد ان زادت الصين من انتاجه وادخلت للاسواق البيتنجان المقلي
وراثيا. فراحت الاربعين والبيتنجان معها
بدلا من ان نطلع مظاهرات ضد الفساد نطلع موكب عزاء على حظنه الاغبر
وقسمتنه الطايح حظها
كم مره كلنالكم يا حكومه من تصعدون الباص خلو اديكم على جيوبكم. وكم مره
نصحناكم, البيتنجان ماينفع استثمروا في الشعير لكثرة المطايا في عالمنا
هاي اللي ردتوها, اكو واحد يضيّع الف مدرسه وخمسين مستشفى وعشر محطات
توليد كهرباء وعشرين مجمع سكني تكفي لأسكان مليون مكرود. واربع حدائق
حيوان نسكنها بدل مدن التنك والاف الكيلومترات من الطرق وعشرات الجسور
هذه ليست مصيبه انها كارثه بكل المقاييس, يمكن يا أخوان اني بطران ومتأثر
بهذوله الكفره الاجانب اللي بلا دين ولا ناموس, بس
يا ويله وسواد ليله السياسي اللي يضيع فلوس الشعب.
مره وزيره هولنديه
لكفها صحفي, مفوله بانزين لسيارتها الخاصه ومقدمه الوصل للحسابات, ما
اريد احجيلكم شنو الرزاله اللي اكلتها الى ان استقالت, والمسكينه تحلف
انها استخدمت سيارتها بعمل رسمي!! يكولولها العمل الرسمي يمكن يحتاج ربع
تفويله الباقي وين صار؟؟
اني اريد اسألكم بلكي واحد مطفّي مثلي يكلّي كم ربع زحلاوي نشتري
بالاربعين مليار حتى نظل سكاره العمر كلّه وما نشوف ولا نسمع واحد يكول
ضيّعنا اربعين مليار ومايشنق نفسه
تحياتي لكم
الخميس أكتوبر 24, 2013 1:24 am من طرف الأميرة الحزينة
